Famil

Famil sen grupo fe insan, hu, fe maxori kaso, da tongo ogar, tonhare pesa ji yam, ji soho jawgu. Membro fe famil pimpan sen genili gwanxido, kom bioli sodar, or legali tongido, kom gamicu. In multi kultura, membro fe famil hare sama or sim familname.

Tipo fe famil

Famil abil na beklase cel multi tipo:

• Plugenerasili famil monhare dayatre, atre, ji bete; moyete tongo ogar. Tras histori, hinto le sen maxim pimpan tipo.
• Nukleusli famil monhare dua atre ji un or plu nengamido nenixuli bete; moyete tongo ogar.
• Unatreli famil monhare un atre ji un or plu bete. Hin atre oro le gwafucu, posgamicu, or nilwatu gamicu.
• Pahna famil ible hare dua mena:
  • To samamena bioli famil, famil hu da sen gwanxido fol xencu.
  • In sosyaltim hu in da nukleusli famil sen fol norma, to mena famil hu da inkludi familyen ex nukleusli famil.
• Famil fol seleti, (pia "seletido famil" or "ewrekado famil") sen pimpan in kwir komuntim, leli askeriyen, dente hu da le suferi burdoyday, ji dente hu da no abil na kontato sesu bioli "atre". Hin tipo monhare grupo fe insan in rensu jiwa hu da rol famil kom ruwojusistem.
• Mixturado famil or gamifamil monhare mixturado atre: minimum un atre le rigamicu, fe folo, te tonporta bete of leli famil cel in neo famil.
• Ungamili famil sen basido fe legali or sosyal ungamiya.
• Plugamili famil sen basido fe plugamiya, hu da inkludi max kom dua gami.