Twitter sen netodom ji sosyal neto cel na lilblogu.
In Twitter, yonguyen abil na irsal lil mesaje hu da name piusa (Englisali tweet). Fe xoru fe Twitter, in 2006, maximum lungoje de mesaje le sen 140 ixara. In mesi desun de 2017, maximum lungoje de mesaje le duaplecu cel 280 ixara.
Yonguyen A abil na folo yonguyen B cel na abil na oko mesaje de yonguyen B en watulinea (Englisali timeline) de yonguyen A. Watulinea sen netosayfa, ji in to, yonguyen abil na oko mesaje de moy folodoyen. Fe xoru de Twitter, mesaje de watulinea fol watuli ordenu, har maxim nerleli mesaje fe supraya de watulinea. Mas fe nunya, mesaje in watulinea cuyo bekarar fal algoritma, ji multi mesaje de folodoyen no sen okoible.
Yonguyen A abil na ripiusa (Englisali retweet) he ban mesaje. Ripiusado mesaje abil na okocu in watulinea de yonguyen hu da folo yonguyen A.
Twitter cudu pesa yon na okogi reklamali mesaje in watulinea de yonguyen.
Problema
Twitter pimpan beyongu cel na disgibe falso informe, fe duli mara yon robotili akonto.
Estrutur de Twitter sahay na kostrui rusotikamera, ji in denpul loka, yonguyen abil na ore sol ijen hu da te suki da.
Multi mesaje de Twitter no ehtiram lega or person koski netodom no hare kufi netopolisiyen.
Aloopsyon
Discentroli aloopsyon de Twitter sen Mastodon. Moyte abil na hare servitul de Mastodon, ji fe estandar, Mastodon no hare reklama, ji watulinea yongu watuli ordenu ji hare sol mesaje de folodoyen.